ADNSU-nun nəzdində Bakı Neft-Energetika Kolleci Azərbaycanın neft, energetika və sənaye sahələri üçün orta ixtisaslı mütəxəssislərin hazırlanması istiqamətində mühüm rol oynayan, zəngin tarixə və formalaşmış təhsil ənənələrinə malik nüfuzlu təhsil müəssisələrindən biridir. Kollecin tarixi ölkəmizdə sənaye və xüsusilə neft sektorunun inkişaf mərhələləri ilə sıx bağlı olmuşdur.

Kollecin təməli 1921-ci ildə Bakı şəhərində neft sənayesinin inkişafı ilə əlaqədar texniki kadrlara artan tələbatın ödənilməsi məqsədilə yaradılmış Bakı Neft Texnikumu və Bakı Energetika Texnikumunun fəaliyyəti ilə qoyulmuşdur. Həmin dövrdə bu təhsil müəssisələri Azərbaycanın sənaye sektorunun inkişafında mühüm rol oynayan texniki mütəxəssislərin hazırlanmasında xüsusi əhəmiyyət kəsb etmişdir.

Azərbaycan Respublikası Nazirlər Kabinetinin 8 fevral 1997-ci il tarixli qərarına əsasən Bakı Neft Texnikumu və Bakı Energetika Texnikumu birləşdirilərək Bakı Neft-Energetika Kolleci yaradılmışdır. Bu birləşmə nəticəsində təhsil müəssisəsinin maddi-texniki bazası daha da gücləndirilmiş, ixtisas istiqamətləri genişləndirilmiş və tədris prosesinin keyfiyyətinin artırılması istiqamətində mühüm islahatlar həyata keçirilmişdir.

Sonrakı illərdə kollecdə təhsil infrastrukturunun yenilənməsi, laboratoriyaların müasir avadanlıqlarla təchiz olunması, yeni ixtisas kabinetlərinin yaradılması və tədris proqramlarının müasir standartlara uyğunlaşdırılması istiqamətində ardıcıl tədbirlər həyata keçirilmişdir. Tədris prosesində innovativ texnologiyaların tətbiqi genişləndirilmiş, tələbələrin praktiki hazırlığının gücləndirilməsi məqsədilə istehsalat təcrübələrinin təşkili daha da təkmilləşdirilmişdir.

Azərbaycan Respublikası Prezidentinin və Nazirlər Kabinetinin təhsil sahəsində həyata keçirdiyi struktur islahatlarına uyğun olaraq 3 fevral 2016-cı il tarixində Bakı Neft-Energetika Kolleci Azərbaycan Dövlət Neft və Sənaye Universitetinin nəzdinə verilmişdir. Bu qərar kollecin inkişafında yeni mərhələnin başlanğıcı olmuş, ali təhsil müəssisəsi ilə inteqrasiyanın gücləndirilməsinə, tədris keyfiyyətinin daha da artırılmasına və tələbələrin gələcək ali təhsil imkanlarının genişlənməsinə əlverişli şərait yaratmışdır.

Bu gün Bakı Neft-Energetika Kolleci öz tarixi ənənələrini qoruyaraq müasir təhsil standartlarına uyğun fəaliyyət göstərir. Kollec neft-qaz sənayesi, energetika, elektrik təsərrüfatı, sənaye texnologiyaları, ekologiya və iqtisadiyyat sahələri üzrə ixtisaslı orta ixtisas mütəxəssisləri hazırlayaraq ölkənin sənaye potensialının gücləndirilməsinə mühüm töhfə verməkdədir.

Fəaliyyət göstərdiyi dövr ərzində kollecin minlərlə məzunu Azərbaycanın müxtəlif dövlət qurumlarında, sənaye müəssisələrində, energetika komplekslərində və özəl sektorda uğurla çalışaraq ölkənin iqtisadi inkişafında yaxından iştirak etmişdir. Bu isə kollecin ölkənin texniki təhsil sistemində tutduğu mövqenin və nüfuzunun göstəricisidir.

Hazırda Bakı Neft-Energetika Kolleci müasir texnologiyalara bələd, yüksək peşə hazırlığına malik, əmək bazarının tələblərinə cavab verən və rəqabətqabiliyyətli mütəxəssislərin hazırlanması istiqamətində öz fəaliyyətini uğurla davam etdirir və təhsil prosesinin keyfiyyətinin daha da yüksəldilməsi istiqamətində ardıcıl tədbirlər həyata keçirir.